قوانين وشروط خذوخل

بأختصار التسجيل عندنا هالايام مجاني يمكن تمسك لها يوم ونحطها في اشتراك كيفنا عادالمهم اذا ودك تشاركنا اضغط على موافق
 واضغط على زر 'التسجيل'الي تحت واذا ماتبي تسجل, اضغط هنا علشان ترجع للمنتدى.

شروطنا على أعضاءنا مالنا دخل في الزوار ومدام انك من أعضاءنا فترى ابونا مايقوى الا على امنا
ومن الحين نقول بالفم المليان إن أي شئ يكتب يعبر عن رأي راعيه ولا نتحمل مسؤوليته
وبما ان هالموقع موقعنا حنا يالاعضاء المسجلين قبلكم وحنا حرين ويكيفنا عشان كذا اللي يبي يسجل معنا لازم يوافق على شروطنا ويكون مسؤول عن أي شي يكتبه ولا مهوب ملزوم يسجل وهالشي راجع له وبكيفه :
1- كل منتدى من هالمنتديات يحق لك تكتب موضوع لكن يناسب المنتدى
 (مهوب تروح لمنتدى الهلالين وتقول ياروحي يالنصر ) والباقين يعلقون عليه ويكيفهم يعلقون يذبون هم حرين وما فيه اي قيود الا ألحكي الماصل اللي ماله سنع أو الحتسي الي مدري وش يبي او قلب المواضيع شات واللي بيقول الحتسي الوصخ والماصل اويقلب المواضيع شات مهوب أزين له واي شي تكتبه لنا الحق نتصرف فيه بأي طريقة كانت  .
2- مسموح الذب بكافة انواعه وترا اللي بيزعل من الذب حنا بنستلمه ذب لأن الزعل عندنا ممنوع اما اللي يسب والسب هنا غير الذب البرئ ( السب يعني الألفاظ البذيئه ) ترانا بنشلخ جبهته . ( نشلخ جبهته = بنفلقه )
 (نفلقه = نصفقه ببياله والا حطبه على جبهته)
3-أي واحد بيكتب موضوع 100اللغه العربيه الفصحى بكيفه بس لا يبلش خلق الله انهم يردون عليه بلغه عربيه فصحى , كل واحد حر يرد زي ما يبي واللي بيغثنا ويبلشنا الا تردون علي بالفصحى بنسنعه تسنيع مضبوط . ترا علمناكم لا تقولون ما درينا والا ما قرينا الشروط .. بكيفكم .
4-تبون تحتسون في الدين والسياسه مايخالف بس لاتقعدون تتفلسفون  في امور مالها سنع , ابعدوا عن الثوابت والطوائف والرموز و الجدل اللي ماينفع واللي يبي يحتسي في هالامور ويتفلسف فيها فيه مية الف منتدى غيرنا يروح لهم يسولف عندهم ثم يجي يوسع صدره معنا بس يجيب لنا مناقشاتهم ..
5- مسموح التسجيل بأسامي الهبال كلها ما عدا المخله بالاداب العامه والأسماء اللي فيها اسم عوايل او قبايل يعني اعقلوا , ترا مناب ناقصين ذب يجي بعده شي في النفوس
6- تتعهد انك ما تعطي كلمة السر لأحد مهوب بعدين تجي تقول مهوب انا اللي قايل ذا الحتسي اللي انكتب .. ترا هالحركات ما تمشي علينا .
7- تحميل صورك وملفاتك على مركز التحميل الخاص بخذوخل
8- احيان بتجيك رسايل من خذوخل . . نبي نترزق الله وونفع خذوخل وان حصل إزعاج نعتذر ويتم التواصل مع الإدارة لمنعها عنكم
9-اذا قريت الشروط كلها ووافقت عليها ونويت تسجل اختار لك اسم يبيض الوجه بشرط مايكون احد مسجل فيه وترا اللي بيحط مدات في اسمه وجا احد واشتكاه انه مقلد اسمه بنشطب اسم الجديد ونخلي القديم والاسم الي تختاره انت مهوب حنا يعني لا تبلشنا غيرو اسمي .
10- هذي شروطنا وان جيت وقلت تراني ماشفت شي هذي مشكلتك محلات النظارات مزاحمه شوارعنا قص لك نظاره وروقنا
ترى شروطنا هي الي مزبوطه والزين عندنا والشين حوالينا
11- قولة انك بتستعرض بايميلك ( ترى كلن عنده أيميل ) والا روابط مواقع مو من اختصاص خذوخل هذي شلها من راسك

اخيراً نتمنى انها ناسبتك الشروط وان عاد ماعجبتك هذي مشكلتك